天氣好好，一朝早九點係東涌集合，搭車出發去昂心經簡林起步。今日係剛豬仲有幾位前輩帶隊，上半場鳳壁石澗，下半場倒腕崖。行入心經簡林既途中見到隻牛係垃圾桶到搵野食..... x_x
到左心經簡林，係鳳凰徑既右邊山路行十分鐘倒，就見到左邊有明顯既入澗位 (左上)。入澗行左陣，會見到右邊一塊好大既壁 (右上) ——鳳羽壁。好似好難咁，但呢到係有得上既 (不過唔係今日既行程)。再前少少就已經係我地要攀爬少少上去既位。
就埋到去既時候，突然聽到前面有人大叫，原來中間果棵大樹 (左下) 有個好大既蜂巢...... 我地驚動左啲唔知咩蜂 (都幾大隻) 飛哂出嚟....... 哇好恐怖，好彩我地係隊尾仲有段距離。等啲蜂冷靜左少少開始飛番埋棵樹既時候，我地先好小心咁貼到最右邊慢慢向前行。
當我地隊尾幾個就嚟埋到夾角位等逐個爬上去既時候，突然有觸動左啲蜂!!!!!! 成堆又衝番哂出嚟，但我地係個死角位到前面係壁有人爬緊唔急得，後面周都比蜂包圍........ 嚇死又唔敢郁... 係正我後面果個無郁但塊面都比人針左兩野........ 我好好彩咁無中到招._. 當前面果個終於爬上左少少之後我第一時間衝上幅牆到向上爬...... 啲蜂無跟上嚟先避過左一劫。呢個位唔太難爬，啲手腳位都幾好，只係比較高少少。
上完頭先個位就會去到下簷崖。緊係要走過去影番張相啦。呢個位呢個景正到好似攀石爬big wall爬到中間咁。真係無諗過唔駛爬石gear就咁行山行澗都可以去到啲咁靚既位(: 影完番番入面再上少少，轉左 (特登走過去望下，因為之後既路係另一邊) 就係上簷崖，都唔錯 (仲會見到遙遠既天壇大彿)。
過左上下簷崖，有條窄窄地既棧道，就會嚟到有個位有得捉樹藤上。又幾得意幾好玩，呢個應該係西馬肚燈籠瀑既BB練習版哈哈。
之後就嚟到鳳壁石澗第二個難位。正路係係有水流落嚟果到正上 (左圖karis爬緊果個位)。佢本身有條繩係到，但唔知仲穩唔穩陣。因為要逐個慢慢上，係隊尾要等就緊架啦。但見到剛豬同joanna係右邊塊壁都上到去，我地又跟住一試，好似係難啲但唔洗咁冼同濕喎。
好啦話說大佬係我前面上，由於幅壁上面啲所謂一級級位都係斜落嚟仲要鋪滿濕既泥同枯草，大佬上左兩米倒既時候竟然左腳冼左，成個位off balance失哂平衡咁！好彩佢隻手夠力，好彩佢鎮定，亦都好彩呢邊呢條霉霉地既繩無斷。最後我地都成功安全地係右邊上左呢層既頂。
係頂回望番下面 (右圖)，個view都唔差既，都鬆一口氣。
嚟到尾聲，前面有塊黑色濕既牆 (只供觀賞，唔駛正攀)，呢個時候就要係左邊爬少少上去。上到草坡再行少少就已經駁番去大大條鳳凰郊遊徑。跟住就係是日下半場——倒腕崖。
