是日一早起身陰天好大霧好焗，天文台話會落雨但一於唔理照原定計劃出發。十一點半係火炭站起行去火炭村入坑 (其實沙田站好似有60k小巴搭入去，不過就咁行過去都唔太遠)。
到黃竹洋村徑，馬路側邊已經係坳背灣坑既下游，但先唔好入澗。走到馬路轉彎位有捷徑直達水壩同集水既直井。
經過一條細水管比我地熱身練平衡(唔好講笑中間都有啲位跣跣地)。上梯級後就見直井左邊有條鐡梯上。(啲danger牌個圖好搞笑)上左去望番落個井見今日唔多水，但隔離集水區啲水勁污糟。
之後見到個入澗位好似幾密好唔friendly，但原來穿左幾步林就入到澗啦:D 啲水無我地想像中咁細，不過好潮濕又唔夠大水啲石面跌既程度 = 9/10，著住對5.10澗鞋都好似溜緊冰咁...完全係平衡力既考驗同訓練......至於中間久唔久要穿既林路就有一百萬個蜘蛛網...... 雖然已經用樹枝整走左好多，都避免唔到食左勁多成面都係.....
行左陣就見到幾靚既陡峽澗道，如果夏天就正啦一定落水游過去! 中間有兩個小型水霸，為左唔濕身都係過左澗道左邊繼續跣住行。
再上就有個中型瀑，好似左邊石入面仲有得玩，可惜今日咁既天氣都係要不斷入林路食蜘蛛算...
林路太惡頂，一有機會即刻出番澗。個小型瀑太濕滑，唯有過澗右邊爬幾步上去。不過呢個位都要少少煩要搵個唔跣既腳位發力就上到。
有條好得意既平衡樹根玩，要順哂跳過去如果唔係會插水:P 我地運氣唔錯無踩水...... 跟住又去到另一個靚峽澗道同瀑，就係我地影相同大休位! 不過停留左一陣就開始有雨同係咁行雷.....
身處澗入面遇著雷暴有啲擔心，唯有加快腳步繼續上澗。
左邊有勁斜既山路避過第一層瀑，一路隨住雷聲上攀呢條落雨好跣好斜好多碎石既山路。上到去有幾個位好開揚可以望到澗對面果幅樹根壁。之後有個位可以落番去第一同第二個瀑中間。最初見咁斜又好大機會要原路上番嚟唔多想落，最後都係忍唔住落去諗住睇下個景都好。
好彩有落到嚟，好靚！不過臨底有啲企，加上咁濕，又見棵樹本身有條tape帶穿左係到，我地就穩陣啲用繩落。之後就過對面探下可唔可以沿瀑邊上。
近睇瀑好好好靚 (: 但埋到去先發現瀑右邊(中下圖)勁濕無乜手腳位唔係好上到...... 有諗住正攀瀑但又有啲駁.... 上左幾步都係乖乖地落番側邊...... 好好彩咁我地之後係右邊有個一隻手掌長既樹根位比我地綁繩借力再 jam腳上......
好好好跣，多謝大佬上到頂再落多條繩比我借力上.....
再上有個漂側邊好多樹根都幾特別。
上左咁耐先嚟到呢個所謂主瀑，都係覺得頭先果啲靚啲好玩啲:P
終於有個位正上又唔驚達落水都好跣但有一級級。
上游部分開始平坦，但都不乏靚景，久唔久都仲會有小瀑布。
玩完精華段係中間山路轉左離澗，駁番去石屎路落黃竹洋村徑。建議可下半場玩黃竹洋坑，但基於今日天氣太濕又焗都係提早徹退落番火炭嘆個下午茶:D
坳背灣坑
