已經幾個月無試過放假咁好天啦！一朝早搭巴士去馬安山濾水廠起步:D 既興奮又緊張，呀發少有地帶哂兩條繩出動，似乎真係唔可以睇少斷鳶壁既難度。沿石屎路行左陣就見到馬鞍山啦，仲要好清楚咁望到哂我地將要玩果幾塊壁。
入澗，又有少少密又有啲荊棘，又係呀發同小明出動係前面開路既時候:P 沿澗一路上都有啲野爬下玩下。開路上澗上左一陣，後面竟然又有另一隊人同我地玩同一條路線! 由於我地太爛玩逐個位係到橫移，佢地係側邊啲路兜過哂啲位就爬左我地頭。
行多陣就嚟到撲樹崖。哇勁靚!!!! 明明睇相都無乜特別，但嚟到可能因為落左成個禮拜雨好大水，成幅壁都有水灑落嚟加有陽光，靚到........
係撲樹崖睇到唔願走，但由於之後仲有好多野趕住玩，唯有繼續行啦。好似話撲樹崖係有得爬壁上既，但咁大水一定無可能啦，我地就響左邊林路上，之後有個位要沿樹根爬少少上去。呢邊再望番出撲樹崖都幾靚。上完果幾步向右橫移少少又繼續向上沿澗上。接住落嚟有幾個細既瀑都幾靚(:
行多陣會見到有好大棵植物 (左圖) 係澗中間，一過左就會見到有左右分源。我地就行右源去彌天壁 (左源好似係可以直接去螺旋壁)。之後見到一個高少少既瀑，呢到左右都上到 (左邊泥路碎石，右邊樹根碎石，總之都係有少少碎)。
嚟到彌天壁啦，好高好有氣勢！第一段係壁既靠左邊上，唔太企所以都無乜大問題。跟住上上下會入番壁左邊既碎石路 (中下圖)，呢到比較企啲要逐個上。真係要小心啲踩，如果唔係好易踢到碎石落下面既人到。
左邊路上上去竟然見meko同呀kate係出面壁中間上緊！我又想出去玩下呀..... 我地後面幾個就就咁殺出塊壁橫移去中間正攀下。佢地出塊壁既位落過我地，話下面有個位幾難上，不過我地已經過左lu:P 橫移到中間，哇好高好企呀！勁正！其實只要爬到下，呢到都唔險既。仲要唔畏高先得，身處咁高既彌天壁中間，望住遠處好靚既景，好爽呀！不過上左少少，見上面果啲全部都係overhang特出嚟又無乜手腳位就無得繼續正攀啦。唯有入番林路啦。(入番林路個位要捉住梱樹跨好大步番番去)。
再上到少少上完彌天壁就可以向左邊橫出發去斷鳶壁。由於覺得無咁快上完斷鳶，又已經十二點幾一點，我地決定係中間好窄既棧道大休開餐。食飽叉夠電就繼續出發。有個位少少爬上去又好多青苔要啲時間，好彩有梱樹係到都易上啲。中途仲意外發現應該係金毛狗脊既植物。之後有個位明明左邊有山路兜，呀發又手痕係舊石都爬上去，搞到我地後面個個爛玩要排隊跟住爬lol
到斷鳶前有塊壁。我地最初係右邊上諗住上到一半既台位橫移番過左邊。但因為今日塊壁太濕，唯有落番去係左邊上。左邊係幾鬆既草坡，落左繩既話會易上少少。
斷鳶！傳說中比較難少少既位。去到果陣見到前面另一隊人仲上緊。過呢位塞車係預料中既事，因為比較難上，如果逐個用五分鐘我地一行十三個人都要用成粒鐘，但無諗過仲要同另一隊人同一日撞線...... 我地係壁下面等左個幾鐘，佢地終於上哂啦。一到我地上，我地大半既人爭住衝上塊壁到lol Meko同呀kate係咁話呀mo上先，但自己兩個已經一支箭咁攝左去隊頭爬左上難位，結果係佢地幫手放繩落嚟哈哈。其實個凸肚位徒手上都並唔係想像中咁難，只要兩隻腳係下面對撐卒高少少，隻手就可以捉到上面幾穩陣既樹幹，之後諗辦法右腳上到右邊台位就無問題。
凸肚之後原來上面都有少少難。感覺上上面如果唔用繩借力有啲位仲難平衡同上。直至上到有樹果到先過哂斷鳶既難位。(我地話早知留番條長少少既繩放上面，下面凸肚位反而淨係果步放條短既就夠)。點都好啦，最後我地個個都有驚無險咁上哂斷鳶:D (好似計番一行13人用左~35分鐘倒，都唔慢呀)
玩完彌天斷鳶本來仲想玩螺旋壁，但因為塞車塞左太耐夠時間..... 唯有下次再戰。跟住我地沿彌天棧道直接過象額脊上馬頭峰，果邊都幾多野爬下個景又唔錯 (: